Alba María, Os Contos de Joselín e as Miniaturas musicais de Eugenio Granell son os artistas e proxectos que aCentral Folque levamos en exclusiva. Mais non son os únicos. Desde sempre, tentamos acompañar a carreira artística dos nosos profesores, alumnos/as e achegados á “comunidade folque” no ámbito máis amplo e das maneiras máis inxeniosas. Así, artistas como Ugia Pedreira, o Dúo Fdz e Quintá, Comisa Bal, Alejandro Vargas, Jazzología… son artistas frecuentes nas nosas producións.

Neste momento temos en marcha unha Rede de Músicas Soltas na que programamos en Concellos de Galiza artistas con voz propia e residencia galega. E tamén levamos anos tentando darlle ao baile o lugar que lle corresponde a carón da música, organizando periódicamente os nosos Bailes Assalto. Ademais deseñamos e organizamos programacións exclusivas para entidades públicas e privadas que teñan interese no noso traballo co patrimonio sonoro galego e coas músicas de raíz.

Ti tamén queres unha programación de música galega? Pequeno formato? Gran formato? Puntual? De continuidade? Nacional? Internacional? Contacta con nós e axudarémosche a facela realidade.